Dunya Ghumman Gheri Beiba - دنیا گھمن گھیری بیبا

 تیری اے نہ میری بیبا

دنیا گھمن گھیری بیبا

جتھے ویکھو نفسا نفسی

ہر تھاں میری میری بیبا

نفس اے تیری مت ای ماری

کردا میری میری بیبا

کس گل دی اے آکڑ تینوں

آخر مٹھی ڈھیری بیبا

حق دا چانن لے کے جاویں

گور اے گھپ اندھیری بیبا

ظالم دا توں ہتھ نہ روکیں

دیویں ہلہ شیری بیبا

اتوں اتوں حاجی بندے

من وچ ہیرا پھیری بیبا

دل دی نگری میلی کیتی

مسند رب دی جیہڑی بیبا

اپنی مرضی چھڈ کے پائی

پیراں دے وچ بیڑی بیبا

جنت بدلے مومن وکیا

اپنی مرضی کیہڑی بیبا

نکھڑ جاوے جس دا ماہی

اس دی عید اے کیہڑی بیبا

مرضی سوہنے رب دی چلدی

میری اے نہ تیری بیبا

ہن تے آ جا رب دے ولے

لا نہ بہتی دیری بیبا